كتب رئيس “التيار الوطني الحر” النائب جبران باسيل، اليوم الجمعة، في منشور على حسابه عبر منصة “إكس”: “عم اتفرّج عليهم وابتسم: حدا همّه يغيظني، وحدا بدّو يرضيني”.
وأضاف، “حدا بيعرف انه معي حق، بس ما لازم اربح! وحدا بيعرف انه ما لازم اخسر، بس ما بيسوى هلقدّ اربح! انا بكل الاحوال ربحت، واقلّه ربحت حالي؛ بتقدروا تفكّروا بالبلد ومصلحته وتنسوني؟؟ وتحكّموا ضميركم بدل ما يتحكّم فيكم حقدكم؟ يا وزراء”.
وتابع، “كيف ممكن تقبلوا رئيس حكومة بيتخطى الدستور والقانون سوا ويسلب صلاحيّة وزير ويمارسها قدّامكم؟ بكرا بيجي دوركم”.
وأردف، “ويا دولة رئيس حكومة، كيف ممكن تضرب هيك ضربة قاضية للطائف وبعدين تبكي عليه؟ ما هيدي روحه! ويا نواب، كيف ممكن تضربوا مبدأ شمولية التشريع وتشرّعوا لصالح شخص وبعدين تحكوا عن دولة القانون والمؤسسات؟!”.
وقال: “يا دولة رئيس مجلس النواب كيف ممكن تقبل بهيك تشريع وانت بتعرف انّه اختصاص الحكومة وضربة كبيرة لفصل المؤسسات؟ وانتوا كلّكم بتعرفوا انه بكل الأحوال، لا فراغ في الجيش، ولا خوف على وحدته، ولن يكون الاّ مسيحي على رأسه، المشكلة مش هون، المشكلة هي نكاية بالداخل وطاعة للخارج”.
واستكمل: “أنا اسامح يلّي بدّو يغيظني واحرّر يلّي بدّو يرضيني، اعملوا شو ما بدّكم، بس اعملوا ضميركم ومصلحة بلدكم”.
وختم: “ما حدا يبتزني او يغريني او يهدّدني، انا ما بعمل الّا قناعتي وضميري”.